У Беларусі ўсё яшчэ застаюцца каля 100 літоўскіх грузавікоў, якія былі затрыманыя беларускім бокам пасля закрыцця Вільнюсам мяжы з нашай краінай у канцы мінулага года. Пра гэта паведаміў кіраўнік асацыяцыі грузаперавозчыкаў Эрландас Мікенас.
“У Беларусі ўсё яшчэ застаюцца каля 100 грузавікоў членаў нашай асацыяцыі”, – сказаў ён, перадае 15min.lt.
Паводле слоў Мікенаса, хутчэй за ўсё, уладальнікі грузавікоў вырашылі адмовіцца ад іх.
“Сітуацыя такая, што плата за вымушаную працяглую стаянку на пляцоўках у Беларусі вышэйшая, чым кошт самой фуры. Эканамічны разлік падказвае рашэнне”, – адзначыў Мікенас.
Нагадаем, літоўскія перавозчыкі, каб вярнуць свае фуры, паводле ўмоў беларускага боку павінны былі аплаціць захоўванне транспартных сродкаў на стаянках. Усяго ў краіне былі затрыманыя каля 4 тыс. транспартных сродкаў. Амаль усе яны выехалі. Аднак яшчэ вясной, калі грузавікі пачыналі вяртацца з Беларусі, прадстаўнікі галіны адзначалі, што рэшткавы кошт часткі з іх можа аказацца прыкметна ніжэйшым за плату, якую патрабуецца ўнесці, каб вярнуць машыны дадому.
