У Мінску затрымалі 65-гадовую жанчыну, якую падазраюць у арганізацыі незаконнага знаходжання замежных грамадзян на тэрыторыі Беларусі. Затрыманне праводзілі супрацоўнікі 3-га ўпраўлення ГУБАЗіК сумесна з падраздзяленнямі па грамадзянстве і міграцыі.
Паводле інфармацыі МУС, раней судзімая пенсіянерка на працягу доўгага часу за грашовае ўзнагароджанне прадастаўляла жыллё выхадцам з краін Паўднёвай Азіі і Паўночнай Афрыкі, якія не мелі законных падстаў для знаходжання ў Беларусі.
За два месяцы дакументавання яе дзейнасці было ўстаноўлена каля 70 пастаяльцаў з 10 краін. На момант затрымання ў чатырохпакаёвай кватэры знаходзіліся 10 іншаземцаў.
Сцвярджаецца, што жанчына атрымлівала з кожнага жыхара па 100 долараў. За ўвесь час праз кватэру прайшлі сотні замежных грамадзян.
Следчыя распачалі крымінальную справу па артыкуле аб арганізацыі незаконнай міграцыі. Падазраваную змясцілі ў ізалятар часовага ўтрымання. Частку іншаземцаў, якія пражывалі ў кватэры, ужо дэпартавалі. Астатнія затрыманы для дачы сведчанняў, пасля чаго іх таксама вышлюць за межы Беларусі.
