Супрацоўнікі крымінальнага вышуку Кастрычніцкага РУУС Мінска затрымалі 21-гадовага жыхара Магілёўскай вобласці, якога падазраюць у серыі крадзяжоў з аўтамабіляў. Правяраецца яго датычнасць як мінімум да двух падобных эпізодаў.
Як паведамілі у ГУУС Мінгарвыканкама, малады чалавек прыехаў у сталіцу ў пошуках працы, аднак замест працаўладкавання пачаў хадзіць па дваровых тэрыторыях і правяраць аўтамабілі на наяўнасць незачыненых дзвярэй.
Выявіўшы незачыненыя машыны, ён пранікаў у салоны і забіраў грошы, якія знаходзіліся ўнутры. У адным з выпадкаў з аўто 36-гадовага жыхара Кастрычніцкага раёна падазраваны выкраў 1800 долараў, пакінутыя ў кашальку. Яшчэ адзін крадзеж адбыўся ў Заводскім раёне Мінска, адкуль былі выкрадзеныя 800 рублёў.
У дачыненні да затрыманага распачата крымінальная справа па артыкуле аб крадзяжы.