Міністр адукацыі Андрэй Іванец акрэсліў асноўныя напрамкі працы сістэмы адукацыі на новы навучальны год. Сярод прыярытэтаў ён назваў гнуткія рэжымы працы ясельных груп, павышэнне якасці падрыхтоўкі настаўнікаў і развіццё інклюзіўнай адукацыі, піша БелТА.
Гэта прагучала на пленарным пасяджэнні семінара-нарады «Аб падрыхтоўцы да пачатку новага 2026/27 навучальнага года» ў Міністэрстве адукацыі.
Іванец адзначыў, што важна ствараць больш гнуткія ўмовы працы дзіцячых садоў.
“Акцэнт тут на стварэнні груп кароткачасовага знаходжання – ад дзвюх да чатырох гадзін, фарміраванні груп 12-гадзіннай працы, працягу фарміравання сеткі ясельных груп для дзяцей ва ўзросце да двух гадоў. Гэта павінна стаць асноўным у цяперашнім навучальным годзе, каб кожная маладая мама магла праявіць сябе прафесійна і выхаваць дзіця”, – сказаў ён.
У агульнай сярэдняй адукацыі асаблівую ўвагу маюць намер надаць настаўнікам. З новага навучальнага года на базе Акадэміі нацыянальнай адукацыі плануецца запусціць школу педагогаў для настаўнікаў-прадметнікаў. У яе працы будуць улічваць вынікі цэнтралізаванага экзамену, нацыянальнага даследавання якасці адукацыі і новага пілотнага праекта для васьмікласнікаў па паглыбленым вывучэнні матэматыкі, фізікі, хіміі і біялогіі.
Асобным напрамкам стане развіццё інклюзіўнай адукацыі. Паводле слоў Іванца, для дзяцей з асаблівасцямі псіхафізічнага развіцця неабходна ствараць індывідуальныя адукацыйныя маршруты. Гаворка ідзе не толькі пра спецыяльныя дзіцячыя сады і школы, але і пра пашырэнне сеткі інтэграваных груп і класаў у звычайных установах дашкольнай і агульнай сярэдняй адукацыі.
“Тут мы бачым неабходнасць пашырэння функцыяналу цэнтраў карэкцыйнага развіцця і навучання. Гэта вельмі важны элемент, які рэалізуе даступнасць для бацькоў і дзяцей не толькі адукацыі, але і сацыялізацыі”, – адзначыў кіраўнік ведамства.
