У радзільным доме №5 Гарадской клінічнай бальніцы Мінска пракаментавалі гісторыю, якая некалькі дзён таму атрымала распаўсюджанне ў сацыяльных сетках. Раней карыстальніца Threads пад нікам by.stremilova распавяла пра пацыентку з замерлай цяжарнасцю 22 тыдні, у якой пачаліся схваткі і адбыўся выкідыш непасрэдна ў палаце. Яна сцвярджала, што медыцынская дапамога была аказана не адразу, а суседка па палаце была вымушана самастойна шукаць супрацоўнікаў бальніцы.
Пра гэта, паводле яе слоў, распавяла сяброўка, якая ляжала ў 5-м раддоме ў гэты час.
“У гэтай дзяўчыны адышлі воды і пачаліся схваткі. І пачаў вылазіць малы. Сяброўка пабегла клікаць хоць каго-небудзь. Знайшла, кажа, там у палаце роды пачаліся. А ёй у адказ: “Ну дык няхай кладзецца ў ложак, рассоўвае ножкі і нараджае”. Сяброўка прыйшла ў палату, трымала гэтую дзяўчыну за руку падчас патуг, убачыла мёртвага малога і плацэнту, урач у выніку прыйшла, калі ўжо ўсё было на выхадзе. Усё гэта адбывалася ў палаце на вачах у чалавека, які ніколі не нараджаў! Псіхалагічна як для парадзіхі, так і для сяброўкі гэта быў стрэс.
Пасля родаў дзіця забралі, а парадзісе сказалі чакаць чыстку. Усё ў палаце ў водах, ложак увесь заліты пасля нараджэння. Вячэра, сяброўка кліча супрацоўнікаў і кажа: «Ці збіраецеся вы прыбіраць, вячэра, я буду есці ў палаце, як мне есці ў такіх умовах?». Ёй адказваюць: “У нас няма санітарак, а мы не абавязаныя прыбіраць тут. Выклікайце каго хочаце, прыбіраць мы не будзем”, – напісала аўтар публікацыі.
“Я б не паверыла ва ўсё гэта, калі б не бачыла відэа і не чула галасавыя размовы з супрацоўнікамі. І відэа, дзе прысутнічае парадзіха.
Выкладваць нічога не буду ў сетку. Але на гарачую лінію тэлефанавала сяброўка і распавяла ўсё”, – дадала яна.
Гісторыя выклікала шырокі рэзананс. Днямі Камітэт па ахове здароўя Мінгарвыканкама паведаміў, што сітуацыя знаходзіцца на кантролі кіраўніцтва і ў бальніцы праводзіцца ведамасная праверка. Правяраюць у тым ліку абставіны перапынення цяжарнасці і этычны бок зносін супрацоўнікаў з пацыентамі. Па выніках збору прапаноў Камітэт плануе арганізаваць сустрэчу з пацыентамі і профільнымі экспертамі для сумеснай выпрацоўкі новых стандартаў дэанталогіі і псіхалагічнай дапамогі ў раддомах.
Сёння сваю версію падзей прадставіў сам раддом. Ва ўстанове заявілі, што распаўсюджаныя ў сацсетках эмацыйныя публікацыі «часта скажаюць рэальнасць», і апісалі тое, што адбылося, з медыцынскага пункту гледжання.
“Планавае лячэнне: У двухмеснай палаце знаходзіліся дзве пацыенткі гінекалагічнага аддзялення. Яны паступілі на планавае лячэнне, а не на захаванне цяжарнасці.
Экстраная сітуацыя: У адной з жанчын стан здароўя рэзка пагоршыўся. Сітуацыя развівалася імкліва, таму ўрач і медсястра прыбеглі ў палату і аказалі дапамогу проста на месцы.
Псіхалагічная падтрымка: Пацыентцы як да, так і пасля таго, што здарылася, урачы прапаноўвалі дапамогу кваліфікаванага псіхатэрапеўта.
Вынік: Урачы і медсёстры аператыўна справіліся са сваёй галоўнай задачай — выратавалі здароўе чалавека. Жанчына ўжо напісала шчырую падзяку ўрачу бальніцы”, – заявілі ў медустанове.
“Медыцынскія крызісы (няхай гэта будзе страта дзіцяці, інсульт або крывацёк) могуць здарыцца з кожным у любую хвіліну. У такі момант чалавеку і ўрачам патрэбныя цішыня і падтрымка. Публікацыя падрабязнасцей чужой бяды ў сацсетках без згоды самой пацыенткі — гэта парушэнне яе права на асабістае жыццё. Лепшае, што можа зрабіць відавочца ў экстранай сітуацыі — гэта паклікаць на дапамогу медыкаў, а не шукаць сенсацыі”, – дадалі ў бальніцы.