Жыхары Віцебскай вобласці паведамілі пра гук, падобны да гулу беспілотніка, які пралятаў, у ноч на 14 жніўня, звярнуў увагу «Флагшток».
Паводле сцвярджэнняў карыстальнікаў сацсетак, характэрны гук быў чутны прыкладна з 1:00 да 2:00 у Віцебску, Сянне, Бешанковічах і іншых населеных пунктах усходняй часткі Віцебскай вобласці.
Пра пралёт беспілотніка з бензінавым рухавіком, «як у мапеда», таксама паведамілі жыхары Старых Дарог і Бабруйска. Дакладны час магчымага пралёту над гэтымі раёнамі невядомы.
У гэтую ноч больш за 50 украінскіх беспілотнікаў атакавалі Ленінградскую вобласць Расіі. У выніку атакі адбыўся пажар у раёне порта Усць-Луга. Акрамя таго, адзін з беспілотнікаў заляцеў на тэрыторыю Латвіі і быў збіты знішчальнікамі НАТА.
Раней «Флагшток» адзначаў, што на працягу апошняга месяца паведамленні пра залёты беспілотнікаў у Беларусь практычна адсутнічалі. Украінскія маніторынгавыя каналы таксама не паведамлялі пра парушэнне паветранай прасторы Беларусі расійскімі беспілотнікамі.
“Адзіны магчымы залёт мог адбыцца каля 4 гадзін раніцы 14 жніўня, калі праз чарнобыльскую зону ва Украіне дрон рухаўся ў бок Беларусі”, – адзначае рэсурс.
