У Польшчы прадухілілі замах на ўкраінскага рэпера і відэаблогера Кіеўстанера (сапраўднае імя — Альберт Васільеў). Пра гэта паведамляе RMF FM са спасылкай на ўласныя крыніцы.
Паводле даных рэсурсу, падчас знаходжання музыканта ў Варшаве ён мог стаць мэтай кілера, які дзейнічаў на замову расійскіх спецслужбаў. Падазраваны аказаўся ўраджэнцам Данбаса. Яго затрымалі супрацоўнікі сталічнай паліцыі пры ўдзеле Агенцтва ўнутранай бяспекі Польшчы (ABW).
Напярэдадні паведамлялася, што меркаваная ахвяра магла быць звязаная з абароннай галіной.
Раней ФСБ Расіі абвінаваціла музыканта ў арганізацыі лагістыкі паставак беспілотнікаў у Маскоўскую вобласць. Паводле версіі расійскіх уладаў, дроны нібыта перапраўляліся са Славакіі праз Польшчу і Беларусь і прызначаліся для атак на стратэгічныя аб’екты. Кіеўстанер быў унесены ў расійскі пералік асоб, датычных да “экстрэмісцкай” і “тэрарыстычнай” дзейнасці.
Крэмль сцвярджае, што ён супрацоўнічае з украінскімі спецслужбамі. Сам музыкант гэтыя абвінавачанні адхіляе.
Кіеўстанер атрымаў вядомасць дзякуючы кароткім гумарыстычным ролікам у інтэрнэце, а затым стаў адным з заснавальнікаў украінскага гурта «Грибы». Пазней ён пачаў сольную музычную кар’еру і пасля пачатку поўнамаштабнага ўварвання Расіі ва Украіну публічна асудзіў расійскую агрэсію.
