80-гадовы арцыбіскуп Тадэвуш Кандрусевіч расказаў пра свой стан пасля выпіскі з бальніцы. Відэазварот іерарха быў апублікаваны на Youtube-канале ксяндза Аляксандра Уласа.
Цяпер Тадэвуш Кандрусевіч праходзіць рэабілітацыю ў Аксакаўшчыне. Ён паведаміў, што пасля Гудагайскага фэсту, дзе адчуваў сябе добра, адправіўся на планавы медыцынскі кантроль. Падчас абследавання лекары зрабілі электракардыяграму і прынялі рашэнне аб шпіталізацыі.
“Як я кажу: стары чалавек падобны да старой машыны. Як там ні наводзь марафет, усё роўна старая машына. Так і ў старога чалавека — то адна, то другая хвароба. Усё сваё жыццё ніколі не хварэў. Апошнія гады гэтыя хваробы адна за адной прыходзяць, ну і якраз пасля Гудагайскага фэсту, дзе я адчуваў сябе вельмі і вельмі добра, мне трэба было ісці на чарговы кантроль да лекараў. І прыйшоў тады, зрабілі электракардыяграму і адразу адправілі ў бальніцу”, – расказаў арцыбіскуп.
Медыкі ўстанавілі некалькі новых стэнтаў, а таксама прачысцілі ўстаноўленыя раней.
“Ну і сёння я знаходжуся на рэабілітацыі ў Аксакаўшчыне. Адчуваю сябе добра, ну і тады я адчуваў сябе добра, нічога не адчуваў, што ў мяне нешта баліць. Толькі лекарам гэта не падабалася, не падабалася мая кардыяграма. Ну так ці інакш, добра, што гэтую аперацыю зрабілі, таму што лекары казалі, што гэта быў перадінфарктны стан. Хачу падзякаваць усім за малітвы, за ваш клопат пра мяне, за памяць. Няхай добры Бог благаславіць, спадзяюся на хуткае выздараўленне і сустрэчу ў касцёле, ля алтара, на малітве, на розных фэстах — там, дзе Бог дазволіць”, – сказаў іерарх.
У 2024 годзе Кандрусевіч перанёс інфаркт і аперацыю на сэрцы. У 2023 годзе ў яго знайшлі рак.
