Міжнародная аўтамабільная федэрацыя (FIA) перагледзела абмежавальныя меры, якія дзейнічалі з 2023 года ў дачыненні да беларускіх і расійскіх спартсменаў, каманд і афіцыйных асоб. Рашэнне Сусветнага савета па аўтаспорце (WMSC) было прынята 3 жніўня і ўступіла ў сілу.
Згодна з новай рэдакцыяй правілаў, беларускія і расійскія пілоты, нацыянальныя каманды, індывідуальныя ўдзельнікі і афіцыйныя асобы цяпер могуць без абмежаванняў удзельнічаць у міжнародных і занальных спаборніцтвах. У прыватнасці, адменена патрабаванне падпісваць абавязацельства аб нейтралітэце. Дазваляецца выкарыстоўваць дзяржаўную сімволіку Беларусі і Расіі на міжнародных і занальных спаборніцтвах. Гэта датычыцца сцягоў, колераў і іншых дзяржаўных сімвалаў на форме, экіпіроўцы і аўтамабілях, а таксама выканання сваіх гімнаў.
Пры гэтым міжнародныя і занальныя спаборніцтвы па-ранейшаму не могуць праводзіцца на тэрыторыі Беларусі і Расіі. Гэтая забарона дзейнічае да далейшага паведамлення.
У FIA падкрэслілі, што рашэнне WMSC з’яўляецца абавязковым для ўсіх удзельнікаў і арганізацый, звязаных з федэрацыяй. Удзел беларускіх і расійскіх спартсменаў, удзельнікаў і афіцыйных асоб у канкрэтнай краіне па-ранейшаму павінен адпавядаць дзейнаму міжнароднаму, нацыянальнаму і мясцоваму заканадаўству.
Федэрацыя таксама заявіла, што працягне сачыць за развіццём сітуацыі вакол расійска-ўкраінскай вайны і пакідае за сабой права ў далейшым уводзіць дадатковыя меры, у тым ліку для выканання дзейных санкцыйных рэжымаў.
