Блок Пракаповіча-Ягорава не будзе ўдзельнічаць у выбарах у Каардынацыйную раду.
“Ва ўмовах працяглай «палітычнай зімы» ў Рэспубліцы Беларусь Блок лічыць важным фарміраванне і развіццё ўстойлівых нацыянальных дэмакратычных структур за мяжой і выказвае падтрымку самому інстытуту Каардынацыйнай рады.
У той жа час, абапіраючыся на досвед удзелу прадстаўнікоў Блока ва ўсіх папярэдніх скліканнях, мы не бачым магчымасці рэалізацыі ўласных доўгатэрміновых мэт, а таксама мэт прадстаўленых намі арганізацый, праз удзел у Каардынацыйнай радзе.
У сувязі з гэтым прынята калектыўнае рашэнне аб няўдзеле Блока ў выбарах.
Жадаем удзельнікам паспяховай выбарчай кампаніі і эфектыўнай працы”, – гаворыцца ў заяве, апублікаванай блокам.
Учора Віктар Бабарыка ад імя аргкамітэта партыі “Разам” таксама заявіў аб няўдзеле ў выбарах у чарговы склад КР.
Трэба адзначыць, што напрыканцы лютага Блок Пракаповіча-Ягорава абвясціў аб выхадзе са складу Каардынацыйнай рады трэцяга склікання, заявіўшы, што гэты фармат «поўнасцю вычарпаў свае магчымасці як інструмент».
Сёння завяршаецца прыём выбарчых спісаў для ўдзелу ў выбарах у КР. Па стане на 30 сакавіка жаданне ўдзельнічаць у іх выказалі шэсць суб’ектаў: “Еўрапейскі выбар”, «Закон і правапарадак», «Кааліцыя Латушкі і Рух «За Свабоду», Блок беларускіх палітычных зняволеных «Беларус дзеяння», «Хопіць баяцца!», Аб’яднаная грамадзянская платформа.
