Савет Бяспекі ААН праводзіць пасяджэнне ў сувязі з ударам па аўтобусе з беларускімі дзецьмі ў Бранскай вобласці Расіі. Беларусь запытала правядзенне пасяджэння ў лісце ад 26 чэрвеня. Запыт падтрымала Расія. Пасяджэнне пачалося сёння а 22:00 па мінскім часе.
Прэс-сакратар беларускага МЗС Руслан Варанкоў раней заяўляў, што Мінск выкарыстае гэтую пляцоўку, каб «данесці да сусветнай супольнасці сваё бачанне таго, што адбылося», і будзе настойваць на правядзенні «аб’ектыўнага і бесстаронняга міжнароднага расследавання». Беларускі бок таксама плануе прыцягнуць увагу Савета Бяспекі да заяў Уладзіміра Зяленскага пра «гатоўнасць наносіць удары па тэрыторыі Беларусі».
Як пастаянны член Савета Бяспекі на пасяджэнні выступіла Расія. Выконваючая абавязкі пастаяннага прадстаўніка Расіі пры ААН Ганна Еўсцігнеева заявіла, што Следчы камітэт РФ расследуе тое, што адбылося, як тэрарыстычны акт у дачыненні да грамадзянскага насельніцтва, і заявіла, што на месцы атакі былі знойдзены доказы таго, што беспілотнік быў украінскім. Яна таксама абвінаваціла Украіну ва ўдарах па грамадзянскіх аб’ектах у Расіі і расказала пра «поспехі» расійскай арміі на фронце.
