Прэс-сакратар МЗС Беларусі Руслан Варанкоў пацвердзіў, што ў найбліжэйшы час адбудзецца пасяджэнне Савета Бяспекі ААН з нагоды атакі на аўтобус з беларускімі дзецьмі ў Бранскай вобласці Расіі. Падчас пасяджэння Беларусь таксама плануе ўзняць пытанне заяў кіраўніцтва Украіны пра «гатоўнасць наносіць удары па тэрыторыі Беларусі».
«У сувязі з тэрарыстычнай атакай на грамадзянскі аўтобус, які перавозіў беларускіх грамадзян, пераважна дзяцей, у Бранскай вобласці Расійскай Федэрацыі 17 чэрвеня Рэспубліка Беларусь звярнулася да старшыні Савета Бяспекі ААН — Калумбіі — з просьбай аб скліканні тэрміновага пасяджэння Савета.
Хацеў бы адзначыць, што ў цяперашні час Беларусь не з’яўляецца членам Савета Бяспекі. Наш зварот быў падтрыманы нашым саюзнікам і пастаянным членам Савета Бяспекі Расійскай Федэрацыяй. У адпаведнасці з часовымі правіламі працэдуры Савета Бяспекі ААН пасяджэнне адбудзецца ў найбліжэйшы час. Беларускі бок мае намер выкарыстаць трыбуну гэтага статутнага органа ААН, каб неадкладна і ў поўным аб’ёме данесці да сусветнай супольнасці сваё бачанне таго, што адбылося», — заявіў Варанкоў.
Прадстаўнік беларускага МЗС падкрэсліў, што Мінск будзе настойваць на правядзенні аб’ектыўнага міжнароднага расследавання.
«Мы будзем настойваць на неабходнасці неадкладнага, аб’ектыўнага і бесстаронняга міжнароднага расследавання. Падобныя злачынствы не павінны замоўчвацца, а вінаватыя — пазбягаць адказнасці. Рэспубліка Беларусь заўсёды паслядоўна выступала і выступае за няўхільнае выкананне нормаў міжнароднага права, абарону грамадзянскага насельніцтва, асабліва дзяцей, якія ніколі і ні пры якіх абставінах не павінны станавіцца мішэнню ва ўзброеных канфліктах», — заявіў ён.
Акрамя гэтага, Беларусь плануе прыцягнуць увагу Савета Бяспекі да заяў украінскага кіраўніцтва.
«Падчас будучага пасяджэння беларускі бок таксама прыцягне ўвагу Савета Бяспекі да нядаўніх заяў кіраўніцтва Украіны, у якіх адкрыта дэкларуецца гатоўнасць наносіць удары па тэрыторыі Беларусі, уключаючы аб’екты крытычнай інфраструктуры. Падобная рыторыка не толькі груба парушае асноватворныя прынцыпы міжнароднага права, але і стварае прамую пагрозу рэгіянальнай і міжнароднай бяспецы, заявілі ў знешнепалітычным ведамстве», — сказаў Варанкоў.
Нагадаем, 19 чэрвеня прэзідэнт Украіны Уладзімір Зяленскі заявіў, што дае Аляксандру Лукашэнку тыдзень, каб прыбраць рэтранслятары для расійскіх дронаў з украінскай мяжы. «Калі ён гэтага не зробіць, зробім мы», — заявіў Зяленскі. 24 чэрвеня Зяленскі заявіў, што рэтранслятары былі адключаныя з 22 чэрвеня.
