На пасяджэнні Камітэта міністраў Рады Еўропы ў Кішынёве 36 дзяржаў і Еўрапейскі саюз выказалі намер далучыцца да новага Пашыранага частковага пагаднення аб стварэнні спецыяльнага трыбунала за злачынства агрэсіі супраць Украіны.
Як паведаміў намеснік кіраўніцы Аб’яднанага пераходнага кабінета Павел Латушка, міністр замежных спраў Украіны Андрэй Сібіга наўпрост назваў Аляксандра Лукашэнку сярод тых, хто падпадае пад юрысдыкцыю трыбунала.
«Гэтыя дзяржавы зрабілі рашучы крок да фактычнага стварэння Спецыяльнага трыбунала і прызнання адказнасці за агрэсію супраць Украіны. Спецыяльны трыбунал уяўляе сабой справядлівасць і надзею.
Цяпер неабходна распачаць дзеянні для выканання гэтага палітычнага абавязацельства, забяспечыўшы функцыянаванне і фінансаванне Трыбунала. Час, калі Расія павінна панесці адказнасць за сваю агрэсію, хутка набліжаецца. Шлях, які нам яшчэ трэба прайсці, — гэта шлях справядлівасці, і справядлівасць павінна перамагчы», — заявіў на сустрэчы Генеральны сакратар Рады Еўропы Ален Берсе.
Ён заклікаў дзяржавы як мага хутчэй завяршыць усе неабходныя нацыянальныя працэдуры для далучэння да Спецыяльнага трыбунала.
Трыбунал будзе расследаваць, пераследаваць у судовым парадку і судзіць асоб, якія нясуць асноўную адказнасць за злачынства агрэсіі супраць Украіны. Яго мэта — запоўніць прабел у юрысдыкцыі Міжнароднага крымінальнага суда (МКС) і прыцягнуць да адказнасці высокапастаўленых асоб, датычных да гэтага злачынства.
«Маральныя асновы Еўропы і свету будуць адноўленыя толькі тады, калі злачынства агрэсіі супраць Украіны будзе пакарана. Гэта не пытанне мінулага. Гэта пытанне будучыні. Пытанне аднаўлення агульнай прасторы праўды, справядлівасці і даверу», — заявіў Андрэй Сібіга.
Латушка падкрэсліў, што вынік стаў у тым ліку следствам працы дэлегацыі Каардынацыйнай рады ў Парламенцкай асамблеі Рады Еўропы. Паводле яго слоў, падчас сесій ПАСЕ былі прынятыя рэзалюцыі, якія сфармавалі рамкі трыбунала з юрысдыкцыяй, што дазваляе прыцягнуць Лукашэнку да адказнасці.
Адпаведная папраўка аб распаўсюджанні юрысдыкцыі трыбунала на меркаваныя злачынствы агрэсіі, здзейсненыя беларускім кіраўніцтвам, была падрыхтаваная камандай Народнага антыкрызіснага ўпраўлення і ўнесеная Латушкам як дэлегатам КР у ПАСЕ.
«Услед за Літвой Украіна аплаціла білет для Лукашэнкі ў Гаагу, праўда ўжо ў межах іншага крымінальнага працэсу», — заявіў Латушка.
Каманда НАУ збірае доказы здзяйснення рэжымам Лукашэнкі акта агрэсіі супраць Украіны для перадачы Спецыяльнаму трыбуналу.
