З пачатку лютага беларускія мытныя органы выявілі 7 фактаў незаконнай транспарціроўкі ў Расію свежых груш агульнай вагой каля 140 тон і коштам каля 960 тысяч рублёў. Парушэнні зафіксаваны ў ходзе спецыяльных мерапрыемстваў паблізу беларуска-расійскай мяжы.
Тры грузавыя аўтамабілі з грушамі былі спынены віцебскімі мытнікамі. Адзін з іх належаў беларускаму перавозчыку, які не меў суправаджальных дакументаў на тавар. Яшчэ два аўто знаходзіліся ва ўласнасці расійскіх перавозчыкаў, аднак прадстаўленыя імі дакументы не адпавядалі ажыццёўленым перавозкам.
Яшчэ адну спробу вывазу садавіны спынілі магілёўскія мытнікі. Індывідуальны прадпрымальнік з Беларусі меў намер перамясціць грушы ў трох грузавіках без прадстаўлення якіх-небудзь дакументаў.
Супрацоўнікі гомельскай мытні ў Рэчыцкім раёне выявілі аналагічнае парушэнне — трэцюю ў гэтым годзе спробу беларускага перавозчыка незаконна вывезці грушы ў Расію.
Па ўсіх фактах распачаты адміністрацыйныя працэсы паводле артыкула 13.12 Кодэкса аб адміністрацыйных правапарушэннях. Перавозчыкам пагражае штраф у памеры да 50% ад кошту прадмета адміністрацыйнага правапарушэння.
