ВУП Расіі працягне запавольвацца ў першым паўгоддзі. Паляпшэнне эканамічнай дынамікі магчыма толькі да канца года. Пра гэта заявіў у Дзярждуме міністр эканамічнага развіцця Максім Рашэтнікаў.
Ён прызнаў, што інфляцыя ў краіне на пачатку года паскорылася на фоне павышэння ПДВ, а таксама росту цэн на харчаванне. Пры гэтым Рашэтнікаў упэўнены, што ёсць рэзерв для змякчэння грашова-крэдытных умоў. Нагадаем, апошні раз Банк Расіі знізіў ключавую стаўку да 16% у канцы снежня. Наступнае рашэнне па ключавой стаўцы расійскі рэгулятар будзе прымаць заўтра, 13 лютага.
«Але трэба разумець, што, якія б рашэнні цяпер ні прымаліся, яны будуць дзейнічаць на эканоміку з лагам. Ацэнка лагу — шэсць–дзевяць месяцаў, часам больш. Таму мы чакаем у першым паўгоддзі далейшага запаволення эканомікі, аднаўленне тэмпаў росту будзе адбывацца ў лепшым выпадку ў канцы 2026 года, але, хутчэй за ўсё, у 2027 годзе», — сказаў міністр, перадае ТАСС.
Мінэканамразвіцця мае намер перагледзець прагноз росту расійскай эканомікі ў сакавіку. У мінулым годзе рост ВУП РФ ацэньваецца ў 1%. МВФ прагназуе на 2026 год рост расійскай эканомікі на 0,9%.
На долю Расіі прыпадае каля 70% знешняга гандлю Беларусі. Таму тэмпы росту расійскай эканомікі ў значнай ступені ўплываюць на дынаміку ВУП Беларусі.