Прэс-служба МУС паведаміла пра чарговае прымяненне зброі супрацоўнікамі ДАІ з мэтай спыніць кіроўцу-парушальніка.
Інцыдэнт адбыўся ў Чавускім раёне на дарозе Цямровічы — Васьковічы — Гарадня. Нарад ДАІ падаў сігнал аб спыненні кіроўцу Audi. Той яго праігнараваў. Пачалася пагоня.
“На неаднаразовыя законныя патрабаванні спыніцца мужчына не рэагаваў, толькі павялічваючы хуткасць, ствараў рэальную пагрозу жыццю і здароўю іншым удзельнікам дарожнага руху. Пасля папярэджання аб выкарыстанні зброі інспектар зрабіў стрэлы па колах”, – гаворыцца ў паведамленні МУС.
Кіроўцам аказаўся 40-гадовы магілёвец, якога раней пазбавілі правоў за кіраванне ў нецвярозым стане. На мужчыну склалі чатыры адміністрацыйныя матэрыялы. Ён знаходзіцца ў ІЧУ. Аўтамабіль змешчаны на ахоўваемую стаянку.
