Урад Расіі можа пайсці на арыгінальны крок для пераадолення паліўнага крызісу, выкліканага атакамі на НПЗ.
Як піша «Коммерсантъ», урад разглядае магчымасць дазволіць выпуск бензіну і дызельнага паліва са зніжэннем стандартаў аж да «Еўра-2». Таксама можа быць дазволены імпарт такога бензіну. Паніжаныя патрабаванні да паліва могуць увесці тэрмінам на адзін год.
Журналісты выдання азнаёміліся з праектам адпаведнай пастановы. Афіцыйна ва ўрадзе гэтую ідэю не каментуюць.
Продаж паліва стандарту «Еўра-2» у Расіі быў забаронены з 2013 года. Раней у РФ ужо дазволілі шэрагу НПЗ выпускаць бензін класа «Еўра-3».
Як растлумачылі выданню эксперты, «Еўра-2» дазваляе выкарыстоўваць нафту ў якасці асновы без глыбокай перапрацоўкі, задзейнічаць магутнасці, якія не могуць выпускаць больш якаснае паліва, і істотна спрасціць вытворчы працэс. Такое рашэнне можа павялічыць вытворчасць бензіну на сотні тысяч тон у месяц. Пры гэтым выкарыстанне паліва стандарту «Еўра-2» можа быць шкодным для сучасных аўтамабіляў.
