Беларусь гатова весці дыялог з Літвой без папярэдніх умоў, заявіў сёння афіцыйны прадстаўнік беларускага МЗС Руслан Варанкоў, адказваючы на пытанне расійскага РІА «Новости».
Беларусь назвала ўмовы, агучаныя прэзідэнтам Літвы Гітанасам Наўседам і прэм’ер-міністрам Літвы Інгай Ругінене, штучнымі ультыматумамі.
«У Мінску неаднаразова і максімальна ясна заяўлялі: мы гатовы абмяркоўваць любыя праблемныя пытанні без якіх-небудзь папярэдніх умоў. Гэта базавы прынцып, які зразумелы ўсім, уключаючы нашых партнёраў за акіянам: нядаўні візіт спецпасланніка Прэзідэнта ЗША Джона Коўла гэта наглядна пацвердзіў.
Штучныя ж ультыматумы, якія спрабуе выстаўляць Вільнюс, не маюць нічога агульнага ні з добрасуседствам, ні з нармальнай дыпламатычнай практыкай», — заявіў Варанкоў.
У МЗС падкрэслілі, што не звярталіся па пасярэдніцтва да трэціх бакоў.
«Пры гэтым звяртаем увагу: Беларусь ні да якіх трэціх бакоў па пасярэдніцтва не звярталася. Ініцыятывы, якія гучаць ад знешніх партнёраў, — гэта іх уласнае бачанне. Мы гатовы такія прапановы разглядаць, але не па чыёй-небудзь указцы», — заявіў прадстаўнік МЗС.
У адказ на прапанову Наўседы беларускаму боку прадэманстраваць добрую волю, Варанкоў абвінаваціў Літву ў стварэнні праблем на мяжы.
«Калі ўжо гаварыць пра «добрасуседскую добрую волю», то сёння ў літоўскага боку назапасілася нямала пытанняў, адказаў на якія патрабуе літоўскае грамадства. Ад працы мяжы і магчымасці наведваць сваякоў, даглядаць магілы блізкіх да разбураных бізнес-сувязяў з Беларуссю. І вырашаць гэтыя пытанні ў адзіночку мы не збіраемся. Тым больш што яны ляжаць у плоскасці інтарэсаў самой Літвы. Адказваць за гэта перад сваім народам давядзецца іх жа кіраўніцтву», — сказаў ён.
«Калі ж літоўскія калегі сёння не настроены на раўнапраўную размову, а аддаюць перавагу публічна пералічваць патрабаванні, замест таго каб сядаць за стол перамоў, — што ж, нежаданне вырашаць назапашаныя пытанні застаецца на іх сумленні. З нашага ж боку адкрытасць да канструктыўнага дыялогу захоўваецца», — заявіў афіцыйны прадстаўнік беларускага МЗС.
Нагадаем, спецпасланнік прэзідэнта ЗША Джон Коўл заявіў, што спадзяецца на пачатак дыялогу паміж Вільнюсам і Мінскам на ўзроўні намеснікаў міністра замежных спраў. Таксама, на яго думку, беларускія калійныя ўгнаенні павінны праходзіць праз Літву.
Прэм’ер-міністр Літвы Інга Ругінене дапусціла магчымасць сустрэчы намеснікаў міністраў пры выкананні шэрагу ўмоў: вырашэнне праблемы з метэазондамі і нелегальнай міграцыяй, вяртанне грузавікоў у Літву без дадатковых збораў і штрафаў. Прэзідэнт Літвы Гітанас Наўседа заявіў, што кантакты з Беларуссю на пэўным узроўні магчымыя, калі беларускі рэжым праявіць добрую волю і не будзе ствараць пагроз для Літвы.
