Міністэрства прыродных рэсурсаў і аховы навакольнага асяроддзя і Дзяржаўную інспекцыю аховы жывёльнага і расліннага свету вырашана не аб’ядноўваць. Пра гэта па выніках сённяшняй нарады ў Аляксандра Лукашэнкі заявіў кіраўнік Мінпрыроды Максім Лысенка.
Лукашэнка паведаміў, што яму прапанавалі такі крок падчас прызначэння Лысенкі. На сённяшнюю нараду быў вынесены праект адпаведнага нарматыўнага прававога акта. Адкрываючы мерапрыемства, Лукашэнка адзначыў, што ідэю не падтрымаў Савет бяспекі.
“Па выніках нарады было вырашана, што Дзяржаўная інспекцыя будзе працаваць па сваіх напрамках, а Міністэрства прыродных рэсурсаў будзе кантраляваць тое, што прадпісана ў нашых нарматыўна-прававых дакументах”, – сказаў Максім Лысенка.
Пры гэтым, паводле яго слоў, паўнамоцтвы інспекцыі могуць пашырыць. Гаворка ідзе не толькі пра спыненне браканьерства, але і пра кантроль за парадкам і недапушчэнне ўтварэння звалак у лесе.
Нагадаем, цяпер Дзяржінспекцыя падпарадкоўваецца непасрэдна Лукашэнку. Прапаноўвалася перадаць яе ў падпарадкаванне Мінпрыроды. Трэба адзначыць, што з 2018 года інспекцыяй кіруе Юрый Тэртэль, брат старшыні КДБ Івана Тэртэля.
