Прэзідэнт Літвы Гітанас Наўседа заявіў, што кантакты з Беларуссю на пэўным узроўні магчымыя, калі беларускі рэжым не будзе ствараць пагроз для Літвы. Зараз ён не бачыць праяўлення добрай волі з боку Мінска.
«Пакуль мы не бачым добрай волі з боку Беларусі, а я якраз сказаў бы, што магчымасці для дыялогу з’яўляюцца тады, калі іншы бок дэманструе добрую волю да развіцця, наколькі гэта магчыма, вядома, добрасуседскіх адносін», — цытуе Наўседу BNS.
Наўседа дапусціў, што дыялог з беларускім рэжымам магчымы, Беларусь не павінна ствараць пагрозы Літве.
«І калі на працягу пэўнага часу мы бачым, што сітуацыя стабільная і што рэжым Беларусі сапраўды не стварае Літве якіх-небудзь прамых пагроз, кантакты, дыялог на пэўным узроўні магчымыя», — сказаў ён.
Наўседа пракаментаваў заяву Коўла пра магчымы транзіт беларускага калію праз Літву і падкрэсліў, што пытанне санкцый на ўгнаенні вырашаецца на ўзроўні Еўрасаюза.
Ён нагадаў, што санкцыі, у тым ліку ў дачыненні да калію, былі нядаўна падоўжаны на год.
«Яны былі ўведзены значна раней і звязаны не столькі з цяперашнімі гібрыднымі атакамі, колькі з парушэннямі правоў чалавека, з незаконнымі прэзідэнцкімі выбарамі 2020 года і, без усякага сумнення, з рэальным дэ-факта ўдзелам Беларусі ў агрэсіўнай вайне Расіі супраць Украіны», — звярнуў увагу Наўседа.
Прэзідэнт Літвы лічыць, што рашэнне Мінска адпусціць літоўскія грузавікі нельга разглядаць як жэст добрай волі, бо яны былі затрыманы незаконна.
Ён таксама звярнуў увагу, што праблема з беларускімі метэазондамі, якія залятаюць у Літву, да гэтага часу не вырашана.
«На жаль, вырашыць не ўдалося, і гэта нават, я б сказаў, дэманструецца такім паказальным спосабам — адразу пасля ад’езду спецпасланніка з тэрыторыі Беларусі. У Беларусі, пры такім рэжыме, трэба быць вельмі дзёрзкім, каб ажыццяўляць дзейнасць такога роду, калі ведаеш, што ўлада катэгарычна супраць. Калі гэта, нягледзячы ні на што, працягваецца, значыць, ёсць дастаткова сур’ёзныя сігналы, што ўлада не толькі не пярэчыць, але і ў пэўнай ступені заахвочвае гэта», — адзначыў Наўседа.
Нагадаем, спецпасланнік прэзідэнта ЗША Джон Коўл заявіў, што спадзяецца на пачатак дыялогу паміж Вільнюсам і Мінскам на ўзроўні намеснікаў міністра замежных спраў. Таксама, на яго думку, беларускія калійныя ўгнаенні павінны праходзіць праз Літву.
Прэм’ер-міністр Літвы Інга Ругінене дапусціла магчымасць сустрэчы намеснікаў міністраў пры выкананні шэрагу ўмоў: вырашэнне праблемы з метэазондамі і нелегальнай міграцыяй, вяртанне грузавікоў у Літву без дадатковых збораў і штрафаў.
