Міграцыйная служба Швецыі абнавіла сваю прававую пазіцыю адносна выдачы грамадзянам Беларусі пашпартоў замежніка.
У прававой пазіцыі службы, апублікаванай у панядзелак, прызнаецца, што грамадзяне Беларусі не могуць атрымаць пашпарт у замежных установах, якія прадстаўляюць краіну. Служба таксама спасылаецца на заяву Спецыяльнага дакладчыка ААН, у якой гаворыцца, што забарона на выдачу і абмен пашпартоў за мяжой “з’яўляецца часткай палітыкі пакарання беларусаў, якія жывуць у выгнанні, уключаючы праваабаронцаў, журналістаў і членаў апазіцыі, за іх меркаваную палітычную нелаяльнасць”.
“У існуючых абставінах беларусаў не варта заахвочваць да паездак у сваю краіну для атрымання пашпарта. На практыцы гэта азначае, што беларускія грамадзяне, якія знаходзяцца за мяжой (гэта значыць за межамі Беларусі), не змогуць атрымаць дакумент, які выконвае функцыю пашпарта”, – гаворыцца ў дакуменце.
Такім чынам, у грамадзян Беларусі з’яўляецца права на атрыманне пашпарта замежніка ў Швецыі, праўда, з абмежаваннем – такі дакумент не будзе сапраўдным для паездак на радзіму.
