Урадавы бізнес-джэт Canadair CL-600-2B19 Challenger 850 з бартавым нумарам EW-301PJ вярнуўся ўчора з турэцкага Бодрума ў Мінск, а сёння зноў плануе вылецець у Бодрум. Пра гэта сведчаць даныя flightradar24.com.
Мяркуючы па актыўнасці самалёта на маршруце паміж Мінскам і турэцкім рэспектабельным курортам, туды плануе адправіцца новая група прывілеяваных адпачывальнікаў.
Першая група курортнікаў знаходзілася ў Бодруме роўна месяц – з 10 ліпеня па 10 жніўня. Урадавы борт прывёз іх у Мінск учора ў 15:07 па беларускім часе.
Паводле даных flightradar24.com, бізнес-джэт з бартавым нумарам EW-301PJ запланаваў новы вылет з Мінска ў Бодрум праз Баку на 12:00 11 жніўня. Затым 12 жніўня самалёт вернецца дадому.
Палёты на ўрадавым самалёце з Мінска ў Бодрум сталі традыцыяй. Аналагічныя рэйсы фіксаваліся ў жніўні-верасні мінулага года і ў чэрвені 2023 года. Вядома, што борт выкарыстоўваюць не толькі высокапастаўленыя беларускія чыноўнікі для камандзіровак, але і члены сям’і Лукашэнкі для асабістых паездак.
