Жыхар Пінска атрымаў тры гады калоніі ўзмоцненага рэжыму па абвінавачанні ў асабліва злосным хуліганстве. Ён ударыў 17-гадовага і 18-гадовага хлопцаў кулаком у твар, а потым ударыў малодшага нажом у спіну, паведамляе пракуратура Брэсцкай вобласці.
Днём 21 красавіка выпіўшы 37-гадовы абвінавачаны знаходзіўся каля аднаго з дамоў на вуліцы Заслонава. Ён убачыў кампанію маладых людзей і вырашыў, што яны «дрэнна паглядзелі» ў яго бок. Мужчына ўдарыў 17-гадовага і 18-гадовага хлопцаў кулаком у твар, а калі ўбачыў, што яны сыходзяць, дастаў нож і ўдарыў у спіну 17-гадовага пацярпелага. Хлопец атрымаў лёгкія цялесныя пашкоджанні.
На судзе мужчына сказаў, што быў п’яны і не кантраляваў свае дзеянні. Ён цалкам прызнаў віну.
Суд прыгаварыў пінчука да трох гадоў калоніі ўзмоцненага рэжыму. Прыгавор не ўступіў у сілу і можа быць абскарджаны.