Мікалай Лукашэнка атрымаў дыплом Пекінскага ўніверсітэта. Сёння ў сталіцы Кітая адбылася ўрачыстая цырымонія ўручэння дыпломаў выпускнікам першай сумеснай адукацыйнай беларуска-кітайскай праграмы БДУ і Пекінскага ўніверсітэта па спецыяльнасці «біятэхналогія».
Перад цырымоніяй Аляксандр Лукашэнка сустрэўся з кіраўніцтвам кітайскай ВНУ. Ён таксама выступіў на ўручэнні дыпломаў. Мяркуючы па ўсім, яго цяперашні візіт у Кітай у тым ліку быў прымеркаваны да заканчэння Мікалаем ВНУ.
«Мы хацелі б, каб пачатак, пакладзены тут, развіваўся. Мы ў Беларусі хацелі б, каб гэтыя праграмы былі глыбокімі і ўсебаковымі, каб яны (мы гэтага таксама хацелі б) былі практыка-арыентаванымі. У адваротным выпадку навошта гэта навучанне, калі яно не будзе ў поўнай меры скіравана на практыку і не будзе прыносіць карысць двум народам?», — сказаў ён.
Мяркуючы па апублікаваных здымках, Мікалай Лукашэнка стаў уладальнікам адразу двух дыпломаў: БДУ і Пекінскага ўніверсітэта.
У 2022 годзе паміж БДУ і Пекінскім універсітэтам было падпісана пагадненне аб стварэнні сумеснай адукацыйнай праграмы бакалаўрыяту па спецыяльнасці «біятэхналогія», а ў ліпені 2025 года — пагадненне па той жа спецыяльнасці ў рамках магістратуры.
