Манахінь Свята-Елісавецінскага манастыра заўважылі ў Свята-Троіцкай царкве ў швейцарскім Берне. На іх звярнуў увагу адзін з прыхаджан, Даніэль Хензелер, і звязаўся з мясцовым прыходам і епархіяй, піша швейцарскае выданне Blick.
На выходных манахіні прадавалі свечкі, кружкі, кнігі, матрошкі і іншыя тавары ля ўваходу ў царкву. Сёстрам не пашанцавала: іх заўважыў выкладчык рускай мовы і спецыяліст па Усходняй Еўропе Хензелер, які ведаў, што манастыр вядомы зборам грошай на амуніцыю для расійскай арміі, што ваюе ва Украіне.
Хензелер накіраваў ліст у прыход, прыходскі бюлетэнь Берна і Базэльскую епархію, запатрабаваўшы закрыць стэнд мінскіх манахінь.
Настаяцель царквы Марыё Хюбшэр патлумачыў выданню, што манахіні атрымалі дазвол на гандаль толькі на мінулыя выходныя.
«Мне неаднаразова ў пісьмовай форме запэўнівалі, што ахвяраванні выкарыстоўваюцца выключна для іх дабрачыннай дзейнасці», — заявіў ён. Настаяцель патлумачыў, што не ведаў пра рэпутацыю манастыра, і выказаў шкадаванне, што стэнд быў успрыняты як палітычная заява.
Паводле слоў Хюбшэра, прыход больш не будзе запрашаць манахінь, «каб у будучыні пазбегнуць асацыяцый, якія выклікаюць здзіўленне».
Свята-Елісавецінскі манастыр і яго духоўнік протаіерэй Андрэй Лемяшонак вядомыя публічнай падтрымкай агрэсіўнай вайны Расіі супраць Украіны. Манастыр неаднаразова арганізоўваў мерапрыемствы ў падтрымку расійскай агрэсіі. За апошнія гады манашак выганялі з калядных кірмашоў у некалькіх еўрапейскіх краінах. Апошні скандал з удзелам манахінь адбыўся ў Швецыі.
