Міністэрства антыманапольнага рэгулявання і гандлю ўстанавіла факты нядобрасумленнай канкурэнцыі і картэльнай змовы. Дзве кампаніі прыцягнулі да адміністрацыйнай адказнасці і пакаралі штрафамі.
Нядобрасумленную канкурэнцыю ўгледзелі ў дзеяннях ТАА «МГК Сталь». Кампанія накіроўвала лісты з ілжывымі звесткамі пра якасць, спажывецкія ўласцівасці, спосабы і ўмовы вырабу тавараў, якія прадавала яе канкурэнт — ТАА «Заходняя Металургічная Кампанія».
«МГК Сталь» прыцягнулі да адміністрацыйнай адказнасці. Эканамічны суд Мінска абавязаў кампанію выплаціць штраф у памеры 200 базавых велічынь (9 тысяч рублёў), а вінаватая службовая асоба атрымала штраф у 35 базавых велічынь (1575 рублёў). Кампанія абскардзіла рашэнне, але Вярхоўны суд не падтрымаў скаргу.
У картэльнай змове абвінавацілі вытворцу сродкаў аховы раслін ТАА «Франдэса» і яго дылераў ТАА «Майстар ураджаю», ТАА «Адкрыты гарызонт» і ТАА «Свет аховы». Іх прыцягнулі да адміністрацыйнай адказнасці і прызначылі штрафы на агульную суму больш за 700 тысяч рублёў. Вінаватыя службовыя асобы кожнага суб’екта прыцягнутыя да адказнасці ў памеры па 100 базавых велічынь (4,5 тысячы рублёў).