Беларускія спецназаўцы вярнуліся са спаборніцтваў UAE SWAT Challenge 2026, якія прайшлі ў Аб’яднаных Арабскіх Эміратах.
Як паведамілі ў прэс-службе МУС, каманду СПБТ “Алмаз” сустракаў міністр унутраных спраў Іван Кубракоў.
“Рады вітаць вас на роднай зямлі. Маладцы! Вы дастойна прадставілі наша ведамства. Выступілі выдатна! Ёсць да чаго імкнуцца, і гэта нармальна. У “Алмаза” ёсць асаблівасць: вы ніколі не спыняецеся на дасягнутым!” – заявіў ён.
Кубракоў таксама падкрэсліў значнасць атрыманага на спаборніцтвах вопыту і пажадаў байцам рухацца толькі наперад.
У паведамленні не прыводзіцца вынік беларускай каманды. Паводле сайта спаборніцтваў, “Алмаз” заняў у агульным заліку 24-е месца. Каманда падраздзялення была адзіным прадстаўніком. Сёлета ў спаборніцтвах удзельнічалі 109 каманд. Першае і другое месца занялі каманды з Казахстана, а трэцяе – з Кітая.
Для параўнання, у мінулым годзе Беларусь была прадстаўлена трыма камандамі. “Алмаз” тады заняў 19-е месца, каманда СОБРа – 33-е, а Мінскага АМАПа – 54-е.
