Міжнародная і Еўрапейская федэрацыі журналістаў (IFJ і EFJ) заклікалі ўлады Беларусі спыніць крымінальны пераслед прадстаўнікоў СМІ і неадкладна вызваліць усіх журналістаў і медыяработнікаў, якія знаходзяцца ў зняволенні па палітычных прычынах. Пра гэта гаворыцца ў сумеснай з Беларускай асацыяцыяй журналістаў (БАЖ) заяве, апублікаванай 7 жніўня.
Арганізацыі адзначылі, што праз 6 гадоў пасля прэзідэнцкіх выбараў 2020 года ціск на незалежную прэсу ў Беларусі працягвае ўзмацняцца. Паводле даных БАЖ, на жнівень 2026 года ў беларускіх турмах знаходзіцца 21 журналіст і супрацоўнік медыя, пазбаўленыя волі па палітычных матывах. Сярод іх ёсць людзі з сур’ёзнымі захворваннямі і пажылыя журналісты. У прыватнасці, журналіст Кірыл Пазняк у маі трапіў у турэмную бальніцу з-за пнеўманіі і каранавіруса.
Адзначаецца, што ў 2026 годзе некалькі прадстаўнікоў СМІ былі асуджаныя на працяглыя тэрміны. Сярод іх былыя кіраўнікі баранавіцкай газеты Intex-Press Уладзімір Янукевіч і Андрэй Пакаленка, якія атрымалі 14 і 12 гадоў пазбаўлення волі па абвінавачаннях у «дзяржаўнай здрадзе». Журналіст Павел Дабравольскі быў прыгавораны да 9 гадоў па аналагічным абвінавачанні. Радыёвядучы Алег Хаменка атрымаў 3 гады за «супрацоўніцтва са СМІ», а журналістка Ціна Палынская — 2 гады па справе аб нібыта супрацоўніцтве з «экстрэмісцкім фарміраваннем». Разам з ёй па гэтай справе была асуджаная яе дачка.
Журналісцкія арганізацыі таксама звярнулі ўвагу на пераслед журналістаў, якія знаходзяцца за межамі Беларусі. Супраць іх распачынаюцца крымінальныя справы, праводзяцца ператрусы ў сваякоў, канфіскуецца маёмасць, а самі журналісты абвяшчаюцца ў міжнародны вышук.
Беларускія журналісты ў выгнанні сутыкаюцца з праблемамі з-за немагчымасці падоўжыць пашпарты пасля заканчэння тэрміну іх дзеяння. Гэта стварае дадатковыя складанасці для іх знаходжання і працы ў краінах ЕС, Украіне і Грузіі.
«Рэжым Лукашэнкі не толькі перашкаджае журналістам выконваць сваю працу і парушае права грамадскасці на інфармацыю, запалохваючы, пераследуючы і заключаючы іх у турму, але і топча самыя асноўныя грамадзянскія правы зняволеных журналістаў і работнікаў СМІ ў эміграцыі.
Мы пацвярджаем нашу непахісную прыхільнасць БАЖ і беларускім журналістам і патрабуем спынення іх крыміналізацыі і пераследу. Мы таксама заклікаем да неадкладнага і безумоўнага вызвалення ўсіх зняволеных журналістаў і работнікаў СМІ», — падкрэслілі заяўнікі.
