Сузаснавальнік Zrobim architects Андрэй Макоўскі выйшаў на волю. Пра гэта ён паведаміў сёння ў Threads, апублікаваўшы ролік, на якім спальвае сумку з рэчамі, што былі ў яго падчас зняволення.
«Ёсць традыцыя: здабыўшы свабоду, спальваць рэчы, у якіх ты там быў. Усім прывітанне, я дома», — напісаў ён.
9 і 10 красавіка ў офіс ZROBIM architects прыходзілі сілавікі. Былі затрыманыя супрацоўнікі, якія знаходзіліся ў студыі. Набліжаны да сілавікоў тэлеграм-канал звязаў затрыманні з допісам Макоўскага ў сацыяльных сетках, у якім ён расказваў пра ліст ад дзяржаўных органаў з патрабаваннем наняць у штат кампаніі ідэолага. Пазней паведамлялася, што прэтэнзіі сілавікоў да Zrobim architects звязаныя з ухіленнем ад выплаты падаткаў.
«Там не было цалкам зарплаты ў канвертах. У нас была пэўная прэміяльная частка, якая выплачвалася супрацоўнікам дадаткова, і, уласна, падаткі з яе не плаціліся. У гэтым я цалкам раскайваюся і прызнаю сваю віну. Таксама частка сум па дамовах была не цалкам адлюстраваная ў дакументах, з якіх падаткі таксама не плаціліся.
Сам шчыра разумею, што ў пагоні за нейкім заробкам хочацца, напэўна, утрымліваць узровень даходу, павышаць узровень даходу і гэтак далей. Але ніколі не думаеш пра адваротны бок гэтага пытання. Мы адразу пайшлі на кантакт са следствам. Я адразу прызнаўся і напісаў яўку з павіннай, бо разумеў, што гэта няправільна», — казаў у сюжэце прапагандыстаў Макоўскі.
Жонка Макоўскага пацвярджала, што ён знаходзіцца ў СІЗА.
