Сёння вечарам у Мінск прыляцеў кіраўнік МЗС Алжыра Ахмед Атаф. Заўтра ён збіраецца сустрэцца з Аляксандрам Лукашэнкам, паведамляе алжырскае МЗС.
«Па даручэнні Прэзідэнта Алжырскай Рэспублікі спадара Абдэльмаджыда Табуна дзяржаўны міністр, міністр замежных спраў, нацыянальнай дыяспары за мяжой і па справах Афрыкі спадар Ахмед Атаф сёння ўвечары прыбыў з афіцыйным візітам у Мінск — сталіцу дружалюбнай Рэспублікі Беларусь», — гаворыцца ў паведамленні.
Акрамя сустрэчы з Лукашэнкам запланаваныя перамовы з кіраўніком МЗС Беларусі Максімам Рыжанковым і «старшынёй Нацыянальнага сходу Беларусі».
Кіраўнікі знешнепалітычных ведамстваў «дадуць ацэнку цяперашняму стану двухбаковых адносін і разгледзяць перспектывы іх далейшага ўмацавання». Таксама плануецца абмен меркаваннямі і пазіцыямі па міжнародных і рэгіянальных пытаннях, якія ўяўляюць узаемную цікавасць для абедзвюх краін.
«Гэты візіт адбываецца ў рамках падтрымкі пазітыўнай дынамікі, якая характарызуе адносіны паміж Алжырам і Беларуссю», — адзначылі ў МЗС Алжыра.
