Сярод пацярпелых у ДТЗ з аўтобусам у Віцебскай вобласці — пяцёра грамадзян РФ, у тым ліку вадзіцель, паведамілі ў пасольстве Расіі ў Беларусі.
Ім аказваецца медыцынская дапамога ў аддзяленнях хірургіі і траўматалогіі Аршанскай гарадской бальніцы №1.
«Расійскія дыпламаты знаходзяцца ў кантакце з праваахоўнымі органамі, профільнымі ведамствамі і медыцынскімі арганізацыямі Рэспублікі Беларусь і гатовыя аказаць пацярпелым расіянам неабходную дапамогу», — праінфармавалі ў дыпмісіі.
Нагадаем, мінулай ноччу аўтобус «Брэст—Масква» перакуліўся ў кювет на дарозе М1 у Талачынскім раёне. У салоне знаходзіліся 14 чалавек, у тым ліку два вадзіцелі. Адна з пасажырак (паводле папярэдніх даных, грамадзянка Беларусі) загінула на месцы.
13 чалавек былі дастаўлены ў Талачынскую цэнтральную раённую бальніцу і Аршанскую гарадскую бальніцу №1. Трое пацыентаў Талачынскай ЦРБ пасля агляду былі накіраваныя на амбулаторнае лячэнне. З пацыентаў, шпіталізаваных у Аршанскую гарадскую бальніцу №1, чатыры чалавекі шпіталізаваныя ў хірургічнае аддзяленне, пяцёра — у траўматалагічнае, адзін — у рэанімацыйнае. У іх дыягнаставаныя траўмы рознай ступені цяжкасці.