Былога вайскоўца з Брэста Аляксандра Рудчыка судзілі паводле абвінавачання ва ўдзеле ў тэрарыстычнай дзейнасці (арт. 290-3, ч. 2 арт. 290-4 КК), стварэнні злачыннай арганізацыі (ч. 2 арт. 285 КК), удзеле ва ўзброеным канфлікце на тэрыторыі замежнай дзяржавы (ч. 1 арт. 361-3 КК). Дакладны прысуд Рудчыку невядомы. Цяпер ён знаходзіцца ў калоніі, піша «Наша Нiва».
Аляксандру Рудчыку 62 гады. Ён нарадзіўся ў расійскім Скавародзіне ў Амурскай вобласці, у 1985 годзе скончыў Ваенны фінансава-эканамічны інстытут Мінабароны Расіі і пасля служыў лейтэнантам у Тындзе.
Паводле даных BelPol, Рудчык доўгі час жыў у Беларусі. З 2003 года працаваў аўдытарам як індывідуальны прадпрымальнік, а ў 2019 годзе закрыў ІП.
З 2022 года Аляксандр жыў за межамі Беларусі. Увесну 2025 года публікаваў фота з Польшчы.
Калі і па якой прычыне ён вярнуўся ў Беларусь — невядома. Справу Рудчыка разглядаў Брэсцкі абласны суд. Паводле ўказаных артыкулаў яму пагражала да 20 гадоў пазбаўлення волі.
