Аляксандр Карнееў з Маладзечна быў завочна асуджаны і вярнуўся ў Беларусь па невядомай прычыне. Яго паўторна судзілі па іншым артыкуле і прыгаварылі да 5,5 года пазбаўлення волі, паведамляе праваабарончы цэнтр «Вясна».
34-гадовы Карнееў жыў у Польшчы. У лістападзе 2024 года яго судзілі завочна па артыкуле аб гвалце або пагрозе прымянення гвалту ў дачыненні да супрацоўніка міліцыі. Суд прыгаварыў яго да трох гадоў калоніі ўзмоцненага рэжыму і прызначыў кампенсацыю маральнай шкоды ў памеры 2500 рублёў.
Па невядомай прычыне Карнееў вярнуўся ў Беларусь, дзе яго судзілі па артыкуле аб садзейнічанні «экстрэмісцкай дзейнасці» (ч. 1,2 арт. 361-4 КК). Ён атрымаў 5,5 года калоніі ўзмоцненага рэжыму і штраф у памеры 42 тысячы рублёў.
Як паведамлялі ў дзяржаўнай газеце ў снежні 2025 года, крымінальная справа была звязаная з арганізацыяй «Дапамога», якая прызнана «экстрэмісцкім фарміраваннем». «Мужчына аказваў садзейнічанне экстрэмісцкай дзейнасці экстрэмісцкага фарміравання “Дапамога” ў арганізацыі незаконнага выезду з Рэспублікі Беларусь асоб, прыцягнутых да крымінальнай і адміністрацыйнай адказнасці за здзяйсненне злачынстваў і правапарушэнняў экстрэмісцкай накіраванасці», – гаварылася ў артыкуле.
Паводле абвінавачання, у 2024 годзе Карнееў, знаходзячыся ў Польшчы, перадаў тэлефон свайму знаёмаму, які выйшаў з калоніі, а таксама перадаў тэлефон мужчыну, які збіраўся выехаць у Літву.
«У перыяд з 01.03.2024 па 02.05.2024 года, знаходзячыся ў Польшчы, праз свайго знаёмага жыхара г. Маладзечна забяспечыў вызваленага з месцаў пазбаўлення волі хлопца сродкамі сувязі, якому апошнім быў перададзены мабільны тэлефон, абсталяваны глабальнай камп’ютарнай сеткай Інтэрнэт, для кантакту з прадстаўнікамі экстрэмісцкага фарміравання. Ён жа ў сваю чаргу кантакты маладога чалавека перадаў прадстаўнікам экстрэмісцкага фарміравання “Дапамога” з мэтай далейшай каардынацыі дзеянняў, абмеркавання дэталяў яго незаконнага выезду за межы Рэспублікі Беларусь у Літву.
Аналагічным чынам, ён паўторна ў адзін з дзён ліпеня 2024 года, але не пазней за 30.07.2024, з мэтай арганізацыі незаконнага выезду за межы Рэспублікі Беларусь у Літву маладога чалавека, які прыцягваўся да адміністрацыйнай адказнасці, з дапамогай свайго знаёмага, арганізаваў перадачу мабільнага тэлефона з сім-картай замежнай дзяржавы для далейшага падтрымання сувязі з прадстаўнікамі названага экстрэмісцкага фарміравання з мэтай каардынацыі дзеянняў, абмеркавання дэталяў незаконнага выезду за межы Рэспублікі Беларусь», — гаварылася ў газеце.
У красавіку 2026 года Карнееў быў унесены ў «спіс экстрэмістаў».
