Банк Расіі прыняў рашэнне знізіць ключавую стаўку на 0,25 п.п. да 14,25% гадавых. Гэта самы невялікі крок з моманту, калі расійскі рэгулятар пачаў зніжаць ключавую стаўку з рэкорднага ўзроўню ў 21% гадавых.
«Устойлівы рост цэн, паводле ацэнкі Банка Расіі, крыху знізіўся, але ў цэлым застаецца ў дыяпазоне 4–5% у пераліку на год. У апошнія месяцы паскорыўся рост крэдытавання. Бюджэтная палітыка на трохгадовым гарызонце будзе больш стымулюючай, чым чакалася раней. Гэта можа запатрабаваць больш высокай траекторыі ключавой стаўкі, чым было закладзена ў красавіцкім базавым сцэнарыі», — гаворыцца ў паведамленні Банка Расіі.
Ён прагназуе, што інфляцыя ў 2026 годзе складзе 4,5–5,5%. Устойлівая інфляцыя складзецца паблізу 4% у другім паўгоддзі 2026 года. У 2027 годзе і далей гадавая інфляцыя будзе знаходзіцца на мэтавым узроўні.
«У красавіку — маі бягучы рост цэн з папраўкай на сезоннасць запаволіўся ў сярэднім да 2,1% у пераліку на год пасля 8,7% у 1к26. Аналагічны паказчык базавай інфляцыі ў сярэднім склаў 4,2% пасля 6,2% у папярэднім квартале. На цэнавую дынаміку ў гэты перыяд істотна ўплывалі валацільныя пазіцыі. У чэрвені яны могуць прывесці да паскарэння бягучых тэмпаў росту цэн», — адзначылі ў Банку Расіі.
Там таксама звярнулі ўвагу на зніжэнне інфляцыйных чаканняў насельніцтва і бізнесу, хоць яны і застаюцца на павышаным узроўні.
Паказчыкі эканамічнай актыўнасці палепшыліся. Расійская эканоміка расце ўмеранымі тэмпамі. У апошнія месяцы паскорыўся рост спажывецкага попыту. Інвестыцыйная актыўнасць крыху вырасла пасля астуджэння на пачатку года, але застаецца стрыманай.
Сярод праінфляцыйных рызык расійскі рэгулятар назваў часовае зніжэнне вытворчасці маторнага паліва. Нагадаем, яно звязана з украінскімі ўдарамі па расійскіх НПЗ. Таксама ў Банку Расіі адзначаюць пагаршэнне перспектыў сусветнай эканомікі і рост цэнавага ціску ў свеце.
«Базавы сцэнарый Банка Расіі прадугледжваў, што на сярэднетэрміновым гарызонце бюджэтная палітыка будзе спрыяць запаволенню інфляцыі. Аднак захаванне першаснага структурнага дэфіцыту бюджэту да 2029 года можа запатрабаваць больш жорсткай грашова-крэдытнай палітыкі, чым у базавым сцэнарыі», — гаворыцца ў паведамленні.
Нагадаем, Расія з’яўляецца асноўным гандлёвым партнёрам Беларусі. Памер ключавой стаўкі ў РФ уплывае на кошт крэдытаў у гэтай краіне, а таксама ўскосна і на попыт на беларускія тавары, у першую чаргу інвестыцыйныя.
