Тэлевядучая і спявачка Кацярына Ваданосава паведаміла, што ёй не давядзецца аплачваць рахунак у 78 313 злотых, які польская бальніца спрабавала спагнаць з яе праз суд за лячэнне яе маці, якая памерла ў студзені.
Як высветлілася, бальніца атрымала ўсе дакументы ад Упраўлення па справах бежанцаў, і выдаткі на лячэнне ўжо аплачаны. Аднак медыцынская ўстанова падала пазоў раней, чым атрымала дакументы аб страхаванні, і пасля забылася яго адклікаць.
«Я тры ночы не спала, мяне ванітавала, прылівы кожныя 10 хвілін, рукі дрыжаць, як у паралітыка, скінула 3 кг», — напісала Ваданосава ў Facebook, апісваючы перажыты стрэс.
Паводле яе слоў, нягледзячы на тое што плаціць ёй не давядзецца, у суд усё роўна трэба падаць пакет дакументаў, паколькі справа фармальна не адклікана.
Раней паведамлялася, што бальніца патрабавала з Ваданосавай 78 313 злотых — рахунак за аперацыю, рэанімацыю маці і паслясмяротныя працэдуры. Суд таксама запатрабаваў ад яе пасведчанне аб нараджэнні ў сціслыя тэрміны.
Нэлі Ваданосава, маці Кацярыны, памерла 1 студзеня 2026 года пасля інсульту. Кацярына збірала сродкі на лячэнне і пахаванне маці, а пасля таго як высветлілася, што медыцынскія рахункі павінна аплачваць страхавая кампанія, астатнія сродкі накіравала на дапамогу вызваленым палітычным зняволеным.
