Прэзідэнт Украіны Уладзімір Зяленскі на саміце Еўрапейскага савета папярэдзіў еўрапейскіх партнёраў, што калі вайна працягнецца ўзімку, то яго краіне спатрэбіцца дадатковая дапамога.
«Вядома, мы хочам скончыць гэтую вайну да зімы — з дапамогай дыпламатыі і ціску на Расію. Але мы разумеем, з кім маем справу. Пуцін — гэта вайна. Таму калі вайна працягнецца, то нам спатрэбіцца зімовы пакет дапамогі. Ён павінен ахопліваць энергетычны пакет — газ, дызель і неабходнае энергетычнае абсталяванне — і ракетны пакет не менш як 300 ракет на зіму. Давайце рыхтавацца да гэтага ўжо цяпер, адначасова максімальна ўзмацняючы дыпламатычныя намаганні. Нам патрэбныя канкрэтныя рашэнні», — пераказаў Зяленскі свой зварот да лідараў ЕС.
Ён таксама падкрэсліў важнасць разблакавання сродкаў European Peace Facility у памеры 6 млрд еўра. Паводле яго слоў, сродкі можна выкарыстоўваць на СПА, далёкабойныя снарады і іншыя магчымасці, якія ўжо даказваюць сваю эфектыўнасць.
