Адзін з вядучых расійскіх каляпалітычных тэлеграм-каналаў «ЕЖ», які кантралюецца Крамлём, учора ўвечары, напярэдадні візіту Аляксандра Лукашэнкі ў Расію, апублікаваў відэа з нібыта перахопленай размовай нібыта беларускага міністра замежных спраў Максіма Рыжанкова. Чыноўнік абмяркоўвае нейкую здзелку з амерыканцамі. Пацвердзіць сапраўднасць відэа немагчыма.
У чорна-белым роліку дрэннай якасці чалавек у касцюме сядзіць на заднім сядзенні аўтамабіля і размаўляе па мабільным тэлефоне. Голас падобны да голасу Максіма Рыжанкова. Гук і выява не супадаюць.
Мужчына абмяркоўвае з падначаленым здзелку з амерыканскім інвестарам, якую асабіста кантралюе «Першы». Мяркуючы па тэхнічных пазнаках, запіс зроблены 19 чэрвеня 2026 года.
«Гэта не проста пытанне “купі-прадай”. Гэта здзелка, якая адчыніць нам дзверы. Мы павінны стварыць механізм. Калі ўсё атрымаецца, сам разумееш, якія козыры будуць у нас на руках», — кажа мужчына і дадае, што «кошт не мае ніякага значэння. Усё потым кампенсуем за кошт суседзяў».
Звяртае на сябе ўвагу, што нібыта Рыжанкоў у нефармальнай размове з падначаленым наўмысна тлумачыць усю важнасць і дэталі здзелкі. Пры гэтым з кантэксту зразумела, што суразмоўца павінен быць у курсе ўсіх дэталяў, бо ён кансультуе міністра. Гэта стварае ўражанне, што відэа — падробка.
Аўтары расійскага тэлеграм-канала, якія напісалі падводку да відэа (скрыншот запісу ніжэй), відавочна, не ведаюць сутнасці размовы і не разумеюць, пра што ідзе гаворка. Яны толькі выказалі здагадку, што Лукашэнка спрабуе прадаць амерыканцам Нежынскі ГАК, але вырашылі, што кампенсаваць страты павінна Расія.
Чаго не скажаш пра аўтараў відэа — запісаны «Рыжанкоў» агучвае галоўную канспіралагічную тэорыю Беларусі апошняга года пра тое, што Лукашэнка ў абмен на Нежынскі ГАК хоча атрымаць прыхільнасць адміністрацыі Трампа. Калі «Рыжанкоў» кажа пра кампенсацыю за кошт суседзяў, ён мае на ўвазе транзіт калію праз Літву, Польшчу і Украіну.
