Беларусь можа атрымаць доступ да распрацоўкі нафтавых радовішчаў у ваюючым Судане, а таксама рэалізаваць сумесныя праекты ў энергетыцы, сельскай гаспадарцы і прамысловасці. Пра гэта паведаміла прэс-служба Міністэрства энергетыкі Судана па выніках пасяджэння суданскай часткі сумеснай камісіі дзвюх краін.
Нараду 10 жніўня правёў міністр энергетыкі Судана і старшыня суданскай часткі Судана-беларускай камісіі Аль-Мутасім Ібрагім Ахмед. У ёй прынялі ўдзел дзяржаўны міністр Міністэрства фінансаў Мухамад Нур ад-Даім, дырэктар Еўрапейскага дэпартамента Міністэрства замежных спраў Джамаль Малік, намеснік міністра энергетыкі, пасол Судана ў Беларусі Амар аль-Амін і іншыя члены камісіі.
Удзельнікі разгледзелі праекты, прапанаваныя для рэалізацыі сумесна з Беларуссю, а таксама меркаваны аб’ём іх фінансавання з боку Банка развіцця Беларусі.
У прыватнасці, Судан зацікаўлены ў павелічэнні экспарту ў Беларусь, будаўніцтве і мадэрнізацыі збожжасховішчаў, лакалізацыі вытворчасці трактароў і сельскагаспадарчай тэхнікі, а таксама кампанентаў і матэрыялаў для электраэнергетычнай галіны.
Асобным напрамкам павінна стаць супрацоўніцтва ў нафтавай галіне. Сярод магчымых праектаў называюцца правядзенне тэхнічных даследаванняў і распрацоўка радовішчаў.
Акрамя таго, бакі разглядаюць супрацоўніцтва ў сферы падрыхтоўкі кадраў і абмену досведам, навукі, культуры і тэлекамунікацый. Абмяркоўваюцца прадастаўленне стыпендый для навучання, праекты ў сферы аховы здароўя і развіццё сувязяў паміж беларускімі і суданскімі ўніверсітэтамі.
“Па выніках нарады профільным ведамствам даручана паскорыць падрыхтоўку тэхнічнай і працэдурнай дакументацыі і вызначыць прыярытэтныя праекты. Пасля гэтага бакі разлічваюць перайсці да зацвярджэння адпаведных пагадненняў і практычнай рэалізацыі праектаў”, – гаворыцца ў паведамленні прэс-службы.
З красавіка 2023 года ў Судане працягваецца грамадзянская вайна паміж урадавай арміяй (SAF) пад кіраўніцтвам Абдэля Фатаха аль-Бурхана і Сіламі хуткага рэагавання (RSF) Махамеда Хамдана Дагала (Хемедці). У 2025 годзе армія аднавіла кантроль над Хартумам і большай часткай цэнтральных і ўсходніх раёнаў краіны, тады як RSF утрымліваюць значную частку захаду, перш за ўсё Дарфур. Асноўныя баявыя дзеянні цяпер сканцэнтраваныя ў Кардафане. Канфлікт прывёў да маштабнага гуманітарнага крызісу і перамяшчэння мільёнаў людзей.
