Іран адкажа ўдарамі па інфраструктуры ў рэгіёне, калі прэзідэнт ЗША Дональд Трамп рэалізуе свой ультыматум у дачыненні да Тэгерана.
У суботу Трамп даў Ірану 48 гадзін на адкрыццё Армузскага праліва. Калі гэтага не адбудзецца, ЗША ўдараць па энергетычнай інфраструктуры Ірана, у першую чаргу па электрагенерацыі. Раней прэзідэнт ЗША ўжо заяўляў, што такімі ўдарамі за гадзіну-паўтары будзе знішчана тое, што потым давядзецца аднаўляць дзесяцігоддзямі.
«Калі вораг нанясе ўдар па паліўнай і энергетычнай інфраструктуры Ірана, то ў адпаведнасці з папярэднімі папярэджаннямі, мэтай стане ўся энергетычная інфраструктура, а таксама інфармацыйныя тэхналогіі і ўстаноўкі па апрасненні вады, якія належаць ЗША і рэжыму ў рэгіёне», — заявіў прадстаўнік іранскай арміі Ібрагім Зольфакары, перадае Reuters.
Корпус стражаў ісламскай рэвалюцыі адрэагаваў на заяву Трампа пагрозай цалкам закрыць Армузскі праліў, пакуль не будуць адноўлены іранскія электрастанцыі, якія пацерпяць у выпадку ўдару ЗША.
Між тым у Іране таксама сцвярджаюць, што судны, якія не належаць “ворагам Ірана”, могуць праходзіць праз праліў пры ўмове ўзгаднення мер бяспекі.
