Генеральная пракуратура Арменіі накіроўвала ў Генпракуратуру Беларусі хадайніцтва аб выдачы Нвера Царукяна, сына алігарха і лідара партыі «Квітнеючая Арменія» Гагіка Царукяна.
Яно было адпраўлена 10 студзеня 2025 года, а 14 лістапада таго ж года быў атрыманы адказ, што хадайніцтва аб выдачы будзе разгледжана на падставе адпаведнага міжнароднага дагавора пасля яго выяўлення і затрымання на тэрыторыі Беларусі, піша Armenpress са спасылкай на Генпракуратуру Арменіі.
Нвер Царукян з’яўляецца фігурантам крымінальнай справы аб хуліганстве з ужываннем зброі ў казіно горада Цахкадзора ў кастрычніку 2024 года. Царукян-малодшы абвінавачваецца паводле артыкулаў аб падбухторванні да здзяйснення рабавання, хуліганстве з ужываннем зброі і незаконным захоўванні зброі.
У лістападзе 2024 года адвакат Царукяна заяўляў, што той адправіўся ў Беларусь у «камандзіроўку».
Пытанне выдачы Царукяна з Беларусі сёння ўзняў прэм’ер-міністр Арменіі Нікол Пашынян на перадвыбарным мітынгу. Ён паабяцаў вярнуць Нвера з Беларусі і прыцягнуць да адказнасці.
«Ёсць адзін, які ў Арменіі абараняе прэзідэнта Беларусі, таму што яго сын на перадавой ні разу не страляў, а страляў у Катайкскай вобласці і ўцёк. Мы яго прывядзём і пасадзім. Хлопец, ты нікуды не ўцячэш, твой бацька цябе таксама не ўратуе, твой дзядзька Робік таксама цябе не ўратуе. …Усіх на каленях прывядзём і прыцягнем да адказнасці. Гагік Царукян, твайго пацана за шкірку прывядзём з Беларусі і прыцягнем да адказнасці», — эмацыйна выказаўся Пашынян (цытата паводле news.am).
Гагік Царукян у адказ назваў крытыку ў адрас членаў сям’і непрымальнай. Ён заявіў, што яго сын вернецца ў Арменію пасля 7 чэрвеня, калі «завершыць свае справы» за мяжой.
Царукян таксама назваў Аляксандра Лукашэнку сваім сябрам і заявіў, што асабістыя адносіны з ім дапамагалі вырашаць важныя для Арменіі пытанні.
«Лукашэнка — мой сябар, ён родны мне чалавек, і ён быў гатовы дапамагчы нашай краіне ў любым пытанні, калі гэта патрабавалася», — сказаў Царукян, дадаўшы, што сяброўства і дзяржаўную працу нельга блытаць.
Царукян не раз называў Лукашэнку сваім сябрам. Пасольства Беларусі ў Арменіі знаходзіцца побач з асабняком Царукяна ў сяле Арындж на ўскраіне Ерэвана. У студзені 2024 года ў госці да Царукяна, як да кіраўніка Алімпійскага камітэта Арменіі, прыязджаў Віктар Лукашэнка. У 2025 годзе пры садзейнічанні Царукяна ў Беларусі была вызваленая затрыманая армянская блогерка Бэла (Роза Бабаханян).
