Савет міністраў зацвердзіў два доўгатэрміновыя дакументы ў сферы біяразнастайнасці.
Пастановай «Аб пытаннях у галіне захавання і ўстойлівага выкарыстання біялагічнай разнастайнасці» прыняты:
- Стратэгія па захаванні і ўстойлівым выкарыстанні біялагічнай разнастайнасці,
- Нацыянальны план дзеянняў па захаванні і ўстойлівым выкарыстанні біялагічнай разнастайнасці на 2026–2030 гады.
Як паведамілі ў прэс-службе ўрада, стратэгія разлічаная да 2030 года. Ёю прадугледжана вырашэнне наступных задач:
- падтрыманне экалагічнай цэласнасці і звязанасці прыродных экасістэм;
- аднаўленне не менш як 30% парушаных і неэфектыўна выкарыстоўваемых экалагічных сістэм;
- павелічэнне плошчы асабліва ахоўваемых прыродных тэрыторый да 9,4% ад агульнай плошчы краіны, плошчы тэрыторый, што падлягаюць спецыяльнай ахове, — да 22%;
- падтрыманне генетычнай разнастайнасці прыроднай флоры і фаўны, культываваных раслін, сельскагаспадарчых і хатніх жывёл, стварэнне і папаўненне Рэспубліканскага банка ДНК чалавека, жывёл, раслін і мікраарганізмаў;
- змяншэнне да мінімуму ўплыву інвазіўных чужародных відаў дзікіх жывёл і дзікарослых раслін на стан экалагічных сістэм;
- мінімізацыя негатыўнага ўплыву змены клімату на біялагічную і ландшафтную разнастайнасць; стварэнне прававых і эканамічных механізмаў, якія стымулююць рацыянальнае выкарыстанне прыродных рэсурсаў.
Нацыянальны план прадугледжвае ўдасканаленне прававога рэгулявання, сістэмы ўліку ў галіне біялагічнай разнастайнасці. У ім прапісаныя меры па развіцці ахоўваемых тэрыторый і г.д. Пазначаныя адказныя выканаўцы мерапрыемстваў і тэрміны іх выканання.
Дзяржаўныя органы павінны ўлічваць палажэнні стратэгіі пры распрацоўцы дзяржаўных праграм.
Каардынацыю дзейнасці дзяржаўных органаў, кантроль за ходам рэалізацыі плана і штогадовае інфармаванне ўрада будзе ажыццяўляць Мінпрыроды.
