У Гродзенскай вобласці падводзяць вынікі конкурсу на самую крэатыўную ялінку. Ён быў абвешчаны ў пачатку снежня тэлеграм-каналам старшыні рэгіёна Юрыя Караева «Пул 4» і Гродзенскім ГПЛХА і праводзіцца трэці год запар.
Чытачам прапануюць прагаласаваць за аднаго з 10 фіналістаў, якіх выбрала рэдакцыя рэсурсу. Некаторыя варыянты афармлення маюць ідэалагічную афарбоўку. Адна з ялін упрыгожана надпісам «Мы — гвардыя прэзідэнта» і сцяжкамі Рэспубліканскага грамадскага аб’яднання «Белая Русь». На другой прадстаўлены фота і сімвалы, звязаныя з Днём Перамогі і патрыятычным праектам «Памяць пакаленняў дзеля будучыні». Яшчэ адзін прэтэндэнт на перамогу — контуры ялінкі з шаўронаў, сцягоў, сярод якіх расійскі і савецкі, і надпісы «АМАП», «Тайфун», «ГУБАЗ», «Працуем, брат».
Пецярых фіналістаў павінны выбраць падпісчыкі. Кожнаму з іх абяцаюць у падарунак жывую ялінку. Адзначаецца, што ўдзельнікамі могуць стаць толькі жыхары Гродзенскай вобласці, узрост значэння не мае.
