Аляксандр Лукашэнка сёння прыняў з дакладам прэм’ер-міністра Аляксандра Турчына. Тэмай дакладу стаў будучы візіт Лукашэнкі ў Маскву і сустрэча з прэзідэнтам РФ Уладзімірам Пуціным.
“У бліжэйшы час мяркуецца сустрэча кіраўніка нашай дзяржавы з прэзідэнтам Расійскай Федэрацыі. Літаральна ўчора ў мяне адбылася размова з маім калегам — старшынёй урада Расійскай Федэрацыі Міхаілам Мішусціным.
У тым ліку мы абмеркавалі магчымы парадак дня сустрэчы нашых кіраўнікоў, нашы сумесныя праекты, далейшыя дзеянні, у тым ліку ў рамках Саюзнай дзяржавы. На працягу літаральна некалькіх наступных дзён мы падрыхтуем інфармацыю кіраўніку дзяржавы для размовы з Уладзімірам Пуціным. Гэта была асноўная тэма майго дакладу кіраўніку дзяржавы”, – сказаў Турчын, перадае БелТА.
Акрамя таго, падчас дакладу абмяркоўваліся “бягучыя пытанні, у тым ліку тыя, што тычацца сацыяльна-эканамічнага развіцця краіны”.
Прэм’ер таксама нагадаў, што перад дакладам адбылася нарада ў Аляксандра Лукашэнкі. Паводле слоў Турчына, нарада ў выніку тычылася не толькі дакументаў, унесеных на разгляд, але і ў цэлым стану ў галінах эканомікі, размова выйшла за межы першапачатковага парадку дня.
Нагадаем, учора прэс-служба беларускага ўрада паведамляла, што Турчын і Мішусцін абмяркоўвалі пытанні беларуска-расійскага гандлёва-эканамічнага і навукова-тэхналагічнага супрацоўніцтва і дамовіліся аб актывізацыі інтэграцыйнага ўзаемадзеяння ў Саюзнай дзяржаве і Еўразійскім эканамічным саюзе, а таксама ход рэалізацыі буйных сумесных эканамічных праектаў.
Аляксандр Лукашэнка адправіцца ў Маскву напрыканцы тыдня. Ён будзе прысутнічаць на парадзе 9 мая.