Сіноптыкі панізілі ўзровень надворнай небяспекі да аранжавага. Раней у Беларусі быў аб’яўлены чырвоны ўзровень небяспекі з-за праходжання снежнага цыклона.
“Днём 9 студзеня (пятніца) захаваюцца складаныя ўмовы надвор’я: на большай частцы тэрыторыі моцны снег, мяцеліца, на дарогах снежныя заносы і ўзмацненне ветру парывамі 15–20 м/с. У г. Мінску чакаецца моцны снег, мяцеліца, на дарогах снежныя заносы”, — гаворыцца ў паведамленні.
Краіну накрыў цыклон, які суправаджаецца вялікімі снегападамі, мяцеліцай, моцным ветрам. За суткі з-за непагадзі ўжо было парушана энергазабеспячэнне ў 251 населеным пункце. Зранку грамадскі транспарт у беларускай сталіцы працуе з перабоямі. Яшчэ ўчора план «Надвор’е» быў уведзены на большай частцы тэрыторыі краіны. БЖД паведамляла пра затрымкі цягнікоў. МНС ужо адчыталася пра выратаванне са снежных заносаў больш як 100 транспартных сродкаў. МУС выведзе на дарогі для аказання дапамогі цяжкую тэхніку ўнутраных войскаў, у тым ліку БТР.
