У Беларусі пры пэўных умовах можна атрымаць 15 млн т збожжа. Пра гэта ў эфіры СТБ заявіў генеральны дырэктар НПЦ Акадэміі навук па земляробстве Сяргей Краўцоў.
“Патэнцыял, пра які вы сказалі, у нас, калі ўсё будзе добра і будуць спрыяльныя ўмовы надвор’я, я думаю, 15 мільёнаў мы можам атрымліваць збожжа”, — сказаў ён.
Нагадаем, летась у Беларусі атрымалі 9,15 млн т збожжавых і зернебабовых. Аднак чыноўнікі апошнім часам залічваюць ва ўраджай збожжавых і алейнае насенне рапсу, што дазваляе ім казаць пра збор у 10 млн т і больш.
Паводле слоў Краўцова, біялагічны патэнцыял беларускіх глеб складае 9 ц/га ў сярэднім па краіне.
“Мы з вамі атрымалі летась 38 цэнтнераў у сярэднім па Рэспубліцы Беларусь. Усё гэта дзякуючы толькі навуцы, дзякуючы людзям, дзякуючы захаванню рэгламентаў і тэхналогіі вырошчвання сельскагаспадарчых культур”, — сказаў ён.
Краўцоў падкрэсліў, што залежнасць ад аграметэаралагічных умоў зніжаецца, што і дазваляе атрымліваць ураджаі большыя за патэнцыйныя.
“Залежнасць вялікая ў нас у Рэспубліцы Беларусь, калі ўзяць, напрыклад, 50 гадоў таму, мы ад кліматычных умоў залежалі на 80%. Цяпер мы ўжо дзякуючы найноўшым распрацоўкам тэхналогій, угнаенняў, сродкаў абароны, рэтардантаў залежым ад прыроды толькі на 40%. Далей мы гэтую залежнасць будзем толькі змяншаць”, — сказаў ён.