Былы намеснік дырэктара Службы інфармацыі і бяспекі (СІБ) Малдовы Аляксандр Балан, затрыманы ў верасні 2025 года па падазрэнні ў працы на беларускі КДБ, знаходзіўся ў аператыўным кантакце з супрацоўнікам КДБ Уладзімірам Варажбітавым, паведамляе румынскае выданне Digi24. На публікацыю звярнула ўвагу «Радыё Свабода».
Паводле інфармацыі выдання, Варажбітава падтрымлівалі яшчэ тры супрацоўнікі КДБ, а раней ён удзельнічаў у каардынацыі іншага шпіёна, Уладзіслава Надзейкі.
Нагадаем, Надзейку затрымалі ў верасні 2025 года ў Польшчы. Ён працаваў таксістам у Беластоку. Пры ім знайшлі спіс імёнаў беларусаў, якія атрымалі прытулак у Польшчы.
Балан меў зносіны з КДБ праз чарнавікі ў электроннай пошце. Гэты спосаб сувязі не патрабуе адпраўкі электронных лістоў. Бакі, якія маюць доступ да пошты, пакідаюць запісы ў папцы «чарнавікі».
Згодна з судовымі крыніцамі, адзін з акаўнтаў, якімі карыстаўся Балан, — [email protected] — быў адкрыты і выдалены з IP-адраса ў Беларусі. Гэта адбылося пасля таго, як у прэсе з’явілася інфармацыя пра затрыманне Балана.
Доступ да гэтай пошты быў з тэлефона Балана маркі Blackview. Тэлефон знайшлі падчас ператрусу ў яго кватэры ў сумцы Фарадэя, якая блакуе электрамагнітныя сігналы і перашкаджае аддаленаму доступу да прылад унутры. У той жа сумцы знаходзілася флэшка на 32 Гб, якая выкарыстоўвалася ў працэсе шыфравання некаторых файлаў з дапамогай прыкладання VeraCrypt.
У іншым паштовым акаўнце Балана было знойдзена некалькі чарнавікоў на рускай мове, датаваных ліпенем 2025 года. Чарнавікі з’явіліся пасля паездкі Балана ў Будапешт у красавіку, дзе ён сустрэўся з супрацоўнікамі беларускага КДБ у комплексе Nova City Apartments. Пасля гэтай сустрэчы ён пісаў справаздачы, якія складаў пасля кантактаў з крыніцамі інфармацыі.
Справа Балана была перададзена ў суд напрыканцы мінулага тыдня. Ён абвінавачваецца ў замаху на дзяржаўную здраду шляхам перадачы сакрэтнай дзяржаўнай інфармацыі, учыненым у працяглай форме, а таксама ў разгалошванні таямніцы, што ставіць пад пагрозу нацыянальную бяспеку.
Нагадаем, Аляксандра Балана затрымалі ў Румыніі ў верасні 2025 года ў рамках сумеснай аперацыі спецслужбаў Чэхіі, Венгрыі і Румыніі. Паведамлялася, што ён працаваў на КДБ з 2024 года і перадаваў звесткі, якія могуць паставіць пад пагрозу нацыянальную бяспеку Румыніі. У выніку той жа аперацыі з Чэхіі выслалі афіцэра КДБ Беларусі, які працаваў пад дыпламатычным прыкрыццём.
