ЗША заклікаюць міжнародную супольнасць прадэманстраваць прэзідэнту Нікарагуа Даніэлю Артэгу, што адмена прэзідэнцкіх выбараў сутыкнецца з рэакцыяй. Пра гэта гаворыцца ў заяве дзяржсакратара ЗША Марка Рубіа.
«Заява Даніэля Артэгі аб тым, што пры дыктатуры яго сям’і ў Нікарагуа больш ніколі не будуць праводзіцца выбары, выкрывае іх сапраўдную аўтарытарную сутнасць. Даніэль Артэга і Расарыа Мурыльё адмовіліся нават ад бачнасці народнай згоды.
Нікарагуанскі народ мае права выбіраць сваіх лідараў праз дэмакратычныя выбары. Злучаныя Штаты заклікаюць міжнародную супольнасць аб’яднаць намаганні, каб прадэманстраваць дыктатуры Мурыльё — Артэгі, што яна не можа разлічваць на захаванне ранейшых адносін з іншымі краінамі, калі яна перашкаджае асноўным прынцыпам нашага дэмакратычнага паўшар’я», — заявіў Рубіа.
Нагадаем, нядаўна Даніэль Артэга, які знаходзіцца пры ўладзе апошнія 20 гадоў пасля перапынку ў дзевяностых гадах мінулага стагоддзя, абвясціў, што прэзідэнцкіх выбараў у краіне больш не будзе.
