Латвійскія вайскоўцы, якія аказваюць дапамогу памежнікам у ахове мяжы з Беларуссю, сутыкнуліся з агрэсіўна настроенай групай мігрантаў.
Як паведамілі ў прэс-службе Узброеных сіл Латвіі, за апошнія суткі вайскоўцы ў межах памежнай місіі спынілі пяць спроб парушэння мяжы. Пры гэтым мігранты паводзілі сябе агрэсіўна: кідаліся палкамі.
«Для спынення незаконных дзеянняў і прадухілення далейшай эскалацыі сітуацыі вайскоўцы ўжылі слезацечны газ. Паколькі гэтыя асобы працягвалі ігнараваць законныя патрабаванні ўладаў і дэманстравалі агрэсіўныя паводзіны, быў зроблены адзін папераджальны стрэл у паветра, пасля чаго яны адступілі на тэрыторыю Беларусі», — гаворыцца ў паведамленні.
Латвія цяпер з’яўляецца асноўным напрамкам міграцыйнага ціску. Так, за 21 ліпеня латвійскія памежнікі сутыкнуліся з 67 спробамі парушэння мяжы мігрантамі, у той час як у Літве і Польшчы не было зарэгістравана ніводнай такой спробы.
