Міліцыя Мінскай вобласці адпрацавала ліквідацыю пратэстаў падчас другога дня камандна-штабных вучэнняў.
Па рашэнні кіраўніка МУС Івана Кубракова уводныя вучэнняў былі кардынальна зменены, каб максімальна наблізіць умовы да рэальнай абстаноўкі. Паводле задумы вучэнняў тэрыторыя вайсковай часці 3214 у Мінску трансфармавалася ў асобны густанаселены пункт.
Сілавікі змадэлявалі блакіроўку маршрутаў і пратэсты.
«Увайшоўшы ва ўмоўны горад, супрацоўнікі неадкладна прыступілі да выканання пастаўленых задач. Яны сутыкнуліся з асяродкамі беспарадкаў: агрэсіўна настроены натоўп сустрэў градам камянёў і бутэлькамі з запальнай сумессю. Радыкалы, каардынаваныя праз Telegram, блакіравалі ў тым ліку праезную частку каля завода, каб паралізаваць яго працу і не дапусціць рабочых на змену. Група маніторынгу грамадскай бяспекі зафіксавала транспартны калапс, масавае скопішча грамадзян, якія выкрыкваюць дэструктыўныя лозунгі, а таксама падпал аўтамабіля», — паведамляе МУС.
Для затрымання ўмоўных пратэстоўцаў сілавікі выкарыстоўвалі матацыклы, заходзячы з тылу.
Таксама было адпрацавана вызваленне закладнікаў у спарткомплексе, штурм аўтобуса і вышыннага будынка.
