Праўленне Беларускай асацыяцыі журналістаў (БАЖ) 25 жніўня прызнала цалкам выкананым сваё рашэнне па справе намесніка старшыні арганізацыі Барыса Гарэцкага. З гэтага дня з яго зняты абмежаванні на выкананне прадстаўнічых і кіраўнічых функцый у БАЖ.
Нагадаем, Праўленне БАЖ адхіліла Гарэцкага ад прадстаўнічых і кіруючых функцый тэрмінам на 12 месяцаў з 14 жніўня 2025 года, калі пачалося расследаванне ў дачыненні да яго. Таксама яму ўстанавілі абмежаванні ў дачыненні да дзелавых кантактаў і абавязалі прайсці навучанне па пытаннях недапушчэння харасменту і парушэння асабістых межаў у прафесійнай дзейнасці.
На пасяджэнні 25 жніўня ў БАЖ пастанавілі, што Гарэцкі выканаў усе прадугледжаныя рашэннем патрабаванні. У прыватнасці, з 14 жніўня 2025 года ён не выконваў прадстаўнічых і кіруючых функцый у арганізацыі, выконваў устаноўленыя абмежаванні і прайшоў адпаведнае навучанне.
Гарэцкі таксама прайшоў трэнінг па гендарнай палітыцы арганізацыі і супрацьдзеянні харасменту і адукацыйную праграму «Мужчыны за гендарную роўнасць і недыскрымінацыю, супраць гвалту і харасменту», арганізаваную Прадстаўніцтвам па сацыяльнай палітыцы Аб’яднанага пераходнага кабінета і шведскай арганізацыяй MÄN пры супрацоўніцтве з Міністэрствам замежных спраў Швецыі.
У сувязі з выкананнем гэтых патрабаванняў Праўленне БАЖ пастанавіла лічыць рашэнне ад 23 снежня 2025 года выкананым і з 25 жніўня зняць абмежаванні з Гарэцкага. Ён зноў можа выконваць прадстаўнічыя і кіруючыя функцыі намесніка старшыні БАЖ у адпаведнасці са статутам арганізацыі і планамі яе працы.
Акрамя таго, Праўленне зацвердзіла праект гендарнай палітыкі БАЖ і накіравала яго на разгляд Савету арганізацыі ў верасні.
Нагадаем, праўленне БАЖ у жніўні 2025 года прыняло рашэнне пачаць разбіральніцтва па сітуацыі вакол магчымых фактаў харасменту з боку намесніка старшыні БАЖ Барыса Гарэцкага. З інфармацыяй пра такія абвінавачанні ў Праўленне звярнуўся сам Гарэцкі. 17 кастрычніка мінулага года праўленне БАЖ разгледзела выніковы даклад упаўнаважаных асоб па выніках збору інфармацыі. Была атрымана адна заява ад асобы, якая лічыць сябе пацярпелай. Заяўніца адмовілася ад далейшай камунікацыі. Атрыманай інфармацыі аказалася недастаткова для прыняцця рашэння аб кваліфікацыі дзеянняў Гарэцкага як харасменту.
Праўленне БАЖ працягнула разбіральніцтва да 1 снежня і прыцягнула да ацэнкі знешняга эксперта. 17 снежня экспертка прадставіла сваё заключэнне. Згодна з рашэннем Праўлення ад 23 снежня 2025 года Гарэцкі быў часова адхілены ад выканання кіруючых функцый у арганізацыі.
